-হুরুখালর মজা
-এমরান হোসেন

হুরুখালর মজার জিনিস
খেমনে কওছাইন ফাউরিতাম
খলাফাতার ঘর বানাইয়া
রান্দাবাসি যে খালাইতাম।

চাউলর ছিন্তা আছিলনা
মাটিদি ভাত রান্দিতাম
তরখারি ত খচুর বাগু
যেবলা ইচ্ছা আনিতাম।

নাইকলর মালাত রান্দা করি
বাটির ফাতাত বাটিতাম
হখলেমিলি খাট বইয়া
খাওয়ার ভান খরিতাম।

খফলর ফাতাদি চা বানাইয়া
চুলার উফরে তইতাম
কাঠল ফাতাদি কাপ বানাইয়া
কুটুম আইলে দিতাম।

খত মজা অইত তখন
এখন কিলা বুঝাইতাম
আবার যদি হুরু অইতাম
দাওতদি নিয়া দেখাইতাম।